Գինու սիրահարներն ավելի երկար են ապրում

Գինի օգտագործելու եւ երկարակեցության միջեւ կապ են հայտնաբերել հոլանդացի գիտնականները։ Բժիշկ Ստրեպելն ու իր գործընկերներն ամփոփել ու մշակել են, այսպես կոչված, «Զյուտֆենյան գիտափորձի» մասնակիցներից՝ Նիդեռլանդների Զյուտֆենում ապրող միջին տարիքի 1373 տղամարդկանցից ստացված տվյալները։

Քառասուն տարի շարունակ՝ 1960-2000-ին անցկացված պարբերական հարցումներով, տեղեկություններ են հավաքել սննդի եւ ալկոհոլի օգտագործման, քաշի, ծխելու եւ հիվանդությունների մասին։ Հաջորդող դիտարկումների ընթացքում գրանցվել է 1130 մահ, որոնց կեսից ավելին պայմանավորված է սրտանոթային հիվանդություններով։

1960 թվականից միչեւ 2000 թվականն ալկոհոլ օգտագործողների թիվը 45%-ից աճել է մինչեւ 86%-ի, ընդ որում՝ գինի օգտագործողների թիվը 2%-ից հասել է 44%-ի։ Ըստ հետագա դիտումների տվյալների՝ չափահաս մարդու կողմից օրական մինչեւ 20գ ալկոհոլի տեւական օգտագործումն, ալկոհոլ չօգտագործողների համեմատությամբ, 67%-ով նվազեցնում է ցերեբրովասկուլյար, 70%-ով՝ սրտանոթային հիվանդություններից մահանալու ռիսկը եւ 25%-ով՝ ընդհանուր մահացությունը։

Ալկոհոլ չօգտագործողների համեմատությամբ՝ չափավոր քանակությամբ ալկոհոլ օգտագործելու մասին հայտնած տղամարդկանց կյանքի սպասվող տեւողությունը 50 տարեկանում պետք է, մոտավորապես, 2 տոկոսով ավելանար։ Կյանքի ակնկալվող տեւողության ավելացումը փոքր–ինչ ցածր ցուցանիշ ուներ օրական 20 գրամից ավելի ալկոհոլ օգտագործողների շրջանում։ Իսկ երբ վերլուծության են ենթարկվել այն դիտարկվողների տվյալները, ովքեր միայն չափավոր քանակությամբ գինի են օգտագործում, պարզվել է, որ նրանց կյանքի տեւողությունը 2,5 տարով ավելի է երկարել, քան ալկոհոլային ուրիշ խմիչքներ օգտագործողներինը եւ 5 տարով ավելի, քան չխմողներինը։

Ուսումնասիրության հեղինակները հայտնել են, որ, համաձայն ունեցած տեղեկությունների, իրենք առաջինն են ուսումնասիրել ընդհանրապես ալկոհոլի եւ ալկոհոլային առանձին խմիչքների ազդեցությունը կյանքի տեւողության վրա։ Նրանք գտնում են, որ իրենց ստացած արդյունքների հաստատման համար լրացուցիչ հետազոտություններ են անհրաժեշտ։

Հարցեր, պատասխաններ, մեկնաբանություններ